आर्थिक–सामाजिक सुधार बिना परिवर्तन असंभवः अध्यक्ष यादव

जनकपुरधाम, १४ अगहनः जनता समाजवादी पार्टी (जसपा) नेपालक अध्यक्ष उपेन्द्र यादव देशमे राजनीतिक परिवर्तन भेलाक बादो जनताके आर्थिक तथा समाजिक सुधार नै भेलासँ बेर-बेर समस्या भ रहल बतौलैन अइछ ।

शैनदिन जनकपुरमे दलित, पिछड़ावर्ग, थारू आदिवासी आ अल्पसङ्ख्यक (डोटिम) परिसङ्घक धनुषा जिलास्तरीय बृहत् अन्तरक्रियामे ओ आर्थिक, सामाजिक परिवर्तन बिना राजनीतिक परिवर्तनसँ मात्रे देश समृद्ध होबाक धारणा व्यक्त केलैन । आबके क्रान्ति आर्थिक आ सामाजिक रुपान्तरणक लेल होबाक चाही उल्लेख करैत अध्यक्ष यादव ओइ लेल डोटिम परिसङ्घके आगु बढ़बाक आवश्यकता भेल बतौलैन । “समाजक जैरमे भेल वर्ग आ समुदायक अवस्थामे परिवर्तन नै भेलाधैर राजनीतिक परिवर्तनके कोनो अर्थ नै होइत छै ।

समाजमे भेल विकृति विसङ्गतिके अन्त्य आ आर्थिक सामाजिक रुपान्तरणसँ मात्रे लोकतन्त्रकेँ मजबुत बनाओत”, ओ कहलैन । दलित, पिछड़ावर्ग, अल्पसङ्ख्यकसभ अलग–अलग लइड़ क समानताके अधिकार प्राप्त नै सकत कहैत ओ एकजुट भ क लड़बाक लेल सबसँ अपिल केलैन ।

डोटिम परिसङ्घक केन्द्रीय संयोजक चन्देश्वर पासवानके अध्यक्षतामे भेल कार्यक्रममे परिसङ्घक सलाहकार डा. पिके ठाकुर डोटिम स्थापनाके उद्देश्य आ अइगला कार्यदिशाके बारेमे अपन विचार व्यक्त कएने छलैन ।