राष्ट्रपति पौडेल जापानमे

काठमाण्डू। चाइर दिनक औपचारिक भ्रमणक लेल राष्ट्रपति रामचन्द्र पौडेल जापान गेल छैथ । हुनका जापानस्थित नारिता अन्तर्राष्ट्रिय विमानस्थलमे जापानक विदेश मन्त्रालयके प्रमुख शिष्टाचार महापाल, नेपालक लेल जापानक राजदूत तोरु मायदा आ जापानक लेल नेपालक कार्यवाहक राजदूत हरिहरकान्त पौडेललगायत स्वागत केलैन अइछ ।

जापान सरकारक निमन्त्रणमे राष्ट्रपति पौडेल पहिल महिला सबिता पौडलसहित नेपाली प्रतिनिधिमण्डलके नेतृत्व करैत रैबदिन राति ओइदिस प्रस्थान कएने छलैन । राष्ट्रपति पौडेलके नेपाल आ जापान बीचक कूटनीतिकसम्बन्ध स्थापना भेल ७०म वर्षगाँठके अवसरमे जापानमे आयोजन होएबला विशेष समारोहमे सहभागी होबाक कार्यक्रम रहल राष्ट्रपतिके प्रेस सल्लाहकार किरण पोखरेल जानकारी देलैन ।

हुनक कहब अनुसार टोकियोस्थित इम्पेरियल प्यालेसमे राष्ट्रपति पौडेलके जापानक सम्राट नारुहितोसँ राजकीय शिष्टाचार भेटवार्ता करबाक कार्यक्रम छैन ।

तहिना, राष्ट्रपति पौडेलके जापानक प्रधानमन्त्री ताकाइची सानाए आ विदेश राज्यमन्त्री होरिइ इवाओ सङे शिष्टाचार भेटवार्ता करबाक कार्यक्रम छैन । प्रेस सल्लाहकार पोखरेलक कहब अनुसार राष्ट्रपति पौडेल भ्रमणक क्रममे जापानी व्यावसायिक समुदाय आ जापानस्थित नेपाली राजदूतावास हुनक सम्मानमे आयोजन करैबला स्वागत समारोहमे सेहो सहभागी हेताह ।

नेपाल जापान बीच १ सेप्टेम्बर १९५६ मे कूटनीतिक सम्बन्ध स्थापना भेल छल । कूटनीतिक सम्बन्ध स्थापनाके बाद १९६५ मे नेपाल टोकियोमे अपन दूतावास स्थापना कएने छल, तँ १९६७ मे जापान काठमाण्डूमे अपन दूतावास स्थापना कएने छल ।

राष्ट्रपति पौडेलके चाइर दिनक भ्रमण सम्पन्न क इएह माघ २१ बुधदिन स्वदेश घुरबाक कार्यक्रम छैन । रासस