लहानमे ‘परसाैती तथा गर्भवती पोषण प्याकेज कार्यक्रम’

सिरहा, २३ अखारः लहान नगरपालिका तीन साल पहिनेसँ सञ्चालन करैत आएल ‘परसाैती तथा गर्भवती पोषण प्याकेज कार्यक्रम’ एखन प्रभावकारी रूपमे आगू बइढ़ रहल अइछ ।

नगरपालिकाक २४ टा वाडमे ‘रोटेसन’के आधारमे प्रत्येक महिनाके २२ गते गर्भवती तथा परसाैतीकेँ पोषण प्याकेज वितरण करैत आएल अइछ । रैवदिन वाड नं २२ मे आयोजित कार्यक्रममे नगरप्रमुख महेशप्रसाद चौधरी ४५ व्यक्तिकेँ पोषण प्याकेज हस्तान्तरण कएलैन । हुनका अनुसार ई कार्यक्रम बितल स्थानीय तहके निर्वाचनपहिने जनतासङे कएल गेल प्रतिबद्धता अनुसार सुरू भेल अइछ ।
“परसाैती अवस्थामे पोषणयुक्त आहारक कमीके कारण बच्चाके पोषणमे गम्भीर असर होइछै, जे भविष्यक लेल खतरा होइ छै। ओ कहलैथ, “एखन ई कार्यक्रम जनस्तरमे बहुते बढ़िया प्रभाव छै, तँए अगिला दिनमे आओर प्रभावकारी बनाबैत जाएब।”

“पहिने गर्भवती आ परसाैतीसभ स्वास्थ्य संस्थामे नियमित जाँच नै कराबैत छलै,” ओ कहलैथ, “आब पोषण प्याकेज प्रक्रियामे नियमित स्वास्थ्य जाँच अनिवार्य भेलासँ स्वास्थ्य संस्थामे आइब रहल छैथ।”

नगरपालिकाके स्वास्थ्य शाखाकी कर्मचारी रीता यादवके अनुसार ई कार्यक्रम मातृ तथा शिशु स्वास्थ्यमे सकारात्मक असर कएने अइछ । पोषण प्याकेजमे चाउर, दाइल, नून, तेल, चना, मोटर, सोयाबिनसहित खाद्य सामग्री समावेश कएल गेल अइछ ।

‘बर्थिङ सेन्टर’ सञ्चालनमे होएत

कार्यक्रमकेँ सम्बोधन करैत नगरप्रमुख चौधरी इएह वाडके तरेगनामे इएह सालसँ ‘बर्थिङ सेन्टर’ सञ्चालनमे करबाक जानकारी देलैन । नगरपालिकाके स्वास्थ्य शाखा एहि सम्बन्धमे आवश्यक सब प्रक्रिया पूरा भ गेल अइछ ।

लहान नगरपालिकाके दुर्गम क्षेत्र तरेगनामे सञ्चालन होएबला ई बर्थिङ केन्द्रसँ स्थानीय महिलासभकेँ सुरक्षित आ सहज प्रसूति सेवा उपलब्ध होबाक अपेक्षा कएल गेल अइछ । लहान नगर प्रमुख महेशप्रसाद चौधरीक अनुसार, वर्षायाममे सड़क अवरुद्ध भेलासँ गर्भवती समयमे अस्पताल नै पहुँच सकैत छैथ, तँए ई केन्द्रसँ आब स्थायी समाधान देल जाएत । एहिमे एमविवि एस डक्टरसहितके सेवा हएत ।” हुनका अनुसार केन्द्र सञ्चालनक लेल आवश्यक पूर्वाधार निर्माण, जनशक्ति व्यवस्थापन आ उपकरण तैयारी अवस्थामे छै ।