लहानको सिटी ग्लोबल स्कुलमा विज्ञान तथा कला प्रदर्शनीः मेयर चौधरीद्वारा विद्यार्थीको सिर्जनशीलताको प्रशंसा

प्रजातन्त्र दिवसको सुअवसर पारेर लहान–१, पडरियास्थित सिटी ग्लोबल पब्लिक स्कुल प्रा. लि. ले एक भव्य ‘विज्ञान तथा कला प्रदर्शनी’ कार्यक्रम सम्पन्न गरेको छ । विद्यालय परिसरमा आयोजित उक्त कार्यक्रममा विद्यार्थीहरूले आफ्नो सिर्जनात्मक क्षमता र वैज्ञानिक सोचलाई विभिन्न हस्तकला र प्रयोगात्मक नमुनाहरूमार्फत प्रस्तुत गरेका थिए ।

लहान नगरपालिकाका मेयर महेश चौधरीको प्रमुख आतिथ्य तथा विद्यालयका संस्थापक प्रिन्सिपल विरेन्द्र कुमार चौधरीको सभाध्यक्षतामा कार्यक्रम सम्पन्न भएको हो ।

कक्षा १ देखि ८ सम्मका विद्यार्थीहरूले स्थानीय स्रोत र साधनको प्रयोग गरी तयार पारेका सामग्रीहरू प्रदर्शनीमा राखेका थिए ।

जसमा विज्ञानतर्फ सौर्य ऊर्जा, जलचक्र, मानव शरीरको संरचना, वातावरण संरक्षण, प्रदूषण नियन्त्रण र विद्युतीय सर्किट जस्ता समसामयिक विषयमा नमुनाहरू प्रदर्शन गरिएका थिए । त्यस्तै, कलातर्फ चित्रकला, हस्तकला, रङ संयोजन र नेपाली मौलिक संस्कृति झल्किने विभिन्न सामग्रीहरू आकर्षणको केन्द्र बनेका थिए ।
प्रदर्शनीको अवलोकन गर्दै प्रमुख अतिथि नगर प्रमुख महेश चौधरीले विद्यार्थीहरूको सिर्जनशीलताको उच्च प्रशंसा गर्नुभयो । उहाँले भन्नुभयो,“यस्ता कार्यक्रमले विद्यार्थीहरूको क्षमता विकासमा महत्वपूर्ण भूमिका खेल्छन् । विद्यालय शिक्षा केवल पुस्तकमा मात्र सीमित नभई व्यवहारिक र प्रयोगात्मक हुनुपर्छ । आजको यस प्रदर्शनीले विद्यार्थीमा आत्मविश्वास बढाउनुका साथै नयाँ कुरा सिक्ने प्रेरणा दिएको छ । नगरपालिका शिक्षा क्षेत्रको समग्र विकास र यस्ता सिर्जनात्मक कार्यका लागि आवश्यक सहयोग गर्न सधैं तत्पर छ ।”

कार्यक्रमका सभाध्यक्ष एवं विद्यालयका संस्थापक प्रिन्सिपल विरेन्द्र कुमार चौधरीले विद्यालयले विद्यार्थीको सर्वाङ्गीण विकासलाई प्राथमिकता दिएको बताउनुभयो । उहाँले दाबी गर्दै भन्नुभयो,“हाम्रो मुख्य उद्देश्य विद्यार्थीभित्र लुकेको प्रतिभालाई प्रस्फुटन गराउनु हो। करिब ३ सय विद्यार्थी अध्ययनरत रहेको यस विद्यालयमा हामीले हरेक वर्ष सुसंस्कारसहितका क्षमतावान् र ’टपर’ विद्यार्थी उत्पादन गर्दै आएका छौँ । हाम्रा विद्यार्थीले अन्य विद्यालयमा गएर पनि आफ्नो श्रेष्ठता पुष्टि गरिरहेका छन् । उनीहरूलाई सिर्जनात्मक, व्यवहारिक र प्रतिस्पर्धी बनाउन हामी निरन्तर लागिपरेका छौँ ।”

सोही अवसरमा विद्यालयले निःशुल्क स्वास्थ्य शिविर समेत सञ्चालन गरेको थियो । शिविरमा सयौँको संख्यामा अभिभावक, विद्यार्थी र स्थानीयवासीले ब्लड प्रेसर तथा सुगरको जाँच गराएका थिए ।

स्कुलकी शिक्षिका वैशाली चौधरीले स्वागत मन्तव्य राख्नुभएको थियो भने कार्यक्रमको उद्घोषण विद्यार्थीहरू स्वयंले गरेका थिए ।

कार्यक्रममा विद्यालयका संस्थापक रामानन्द चौधरी, शिक्षाविद् रामनारायण चौधरी, अरविन्द चौधरी, खडक नारायण चौधरी, प्याब्सन केन्द्रीय सचिव विष्णु न्यौपाने लगायत बुद्धिजीवी र सञ्चारकर्मीहरूको उल्लेखनीय उपस्थिति रहेको थियो ।

अभिभावकहरूले आफ्ना बालबालिकाको क्षमता देखेर खुसी व्यक्त गर्दै यस्ता कार्यक्रमले सिकाइलाई थप प्रभावकारी बनाउने विश्वास व्यक्त गरेका छन् ।