भ्वाइस खबर
काठमाण्डू, १२ अगहनः अख्तियार दुरुपयोग अनुसन्धान आयोग धनुषा जिलाक कमला नगरपालिकाक तत्कालीन नगरप्रमुख राम उदगार गोइतसहित १० गोटे विरुद्ध विशेष अदालत काठमाण्डूमे आरोप पत्र दायर केलक अइछ ।
आयोगक प्रवक्ता राजेन्द्र कुमार पौडेलक कहब अनुसार लग्मा बजार लग भेल पोखैरके भिड़पर माइट भरबाक तथा तथा घाट निर्माणमे ठेका प्रक्रियामे मिलिभगत क सार्वजनिक सम्पत्ति हिनामिना कएने अभियोगमे वृहस्पैतदिन हुनकासभपर आरोप पत्र दायर कएल गेल अइछ ।
आर्थिक वर्ष २०७६/७७ के लेल स्वीकृत करसहित ७५ लाख टका लागत अनुमान भेल योजनामे बोलपत्र प्रक्रियामे सबसँ कम कबोल (४२ लाख ७४ हजार ५ सओ ५१ दशमलव ७१ टका) करैबला ‘सेट स्क्वायर कन्सट्रक्सन प्रालि’ सँ सम्झौता नै क दोसर कम कबोल (७२ लाख २१ हजार ७ सओ ३० दशमलव ७ टका) करैबला ‘इन्फ्रास्ट्रक्चर एस एण्ड बी बिल्डर्स प्रालि’केँ गैरकानुनी रुपमे ठेक्का देने आयोगक ठहर अइछ ।
नगरपालिकाक पदाधिकारीसभ सेट स्क्वायर कन्सट्रक्सनद्वारा पेस कएल गेल कागजात तथा बैंक जमानत बदनियतपूर्वक नुका क नष्ट करैत सम्झौता नै करबाक लेल निर्णय करोने आ उल्टे उक्त फर्मके विड बोण्ड जफत क दोसर प्रस्ताव दातासँ सम्झौता प्रक्रियामे आगु बढ़ल आयोगक अनुसन्धानमे भेटल अइछ । वि.सं. २०७७ जेठ २१ गते इन्फ्रास्ट्रक्चर एस एण्ड बी बिल्डर्स प्रालिसँ ७२ लाख १८ हजार ६ सओ ८० के हिसाबसँ सम्झौता क भुक्तानी सेहो देल गेल आ अइ तरहे कएल गेल ठेक्का फेरबदलसँ २९ लाख ४४ हजार १ सओ ३७ दशमलव २९ टका बराबरके सरकारी धन हिनामिना भेल आयोगक निष्कर्ष अइछ ।
आरोप पत्रमे गोइतसहित कार्यपालिका सदस्य धनेश्वर यादव, धर्मनाथ मण्डल, पल्टु कवारी, विनोद राम, समसुल मिया मोमिन, निमित्त प्रमुख प्रशासकीय अधिकृत वीरेन्द्र कुमार सढान, लेखापाल सञ्जिव कुमार महतो, जिन्सी शाखा प्रमुख जुगल किशोर यादव तथा ठेक्का भेटल कम्पनीके अध्यक्ष सन्तोष कुमार यादवसहितकेँ भ्रष्टाचार निवारण ऐन, २०५९ अनुसार सजायके माँगसहित प्रतिवादी बनाएल गेल आयोगक प्रवक्ता पौडेल जनाकारी देलैन ।
भ्वाइस खबर
प्रतिक्रिया