कीर्तिपुरमा मिटरब्याज पीडितमाथि प्रहरीको लाठी

कीर्तिपुर — न्यायका लागि तराईका विभिन्न स्थानबाट काठमाडौं आएका मिटरब्याज पीडितहरुमाथि प्रहरीले कीर्तिपुरमा बल प्रयोग गरेको छ । कीर्तिपुरमा अस्थायी बसोबासस्थल बनाएका उनीहरु सोमबार कीर्तिपुर गेटनजिकै विभिन्न नारासहितका प्लेकार्ड बोकेर प्रदर्शनमा उत्रेका थिए । सोही क्रममा उनीहरुमाथि प्रहरी जाइलागेको हो । ४१ दिनदेखि उनीहरु कीर्तिपुरबाट माइतीघर मण्डलमा भेला भएर धर्ना दिइरहेका थिए । प्रहरी आन्दोलनरत किसानलाई कीर्तिपुरमा रोकेको छ ।

प्रहरीको कुटाईबाट ४–५ किसान तथा युवाहरु घाइते भएका छन् । प्रहरीले आफूहरुमाथि बलप्रयोग गरी घेराबन्दीमा राखेपनि उनीहरुले सरकारसामु न्यायको माग गर्दै नाराबाजी गरेका थिए । अहिले प्रहरीले करिब २० प्रदर्शनकारीहरुलाई उक्त स्थानबाट नियन्त्रणमा लिएर गएको छ ।