भारत सरकारद्वारा नेपालक स्वास्थ्य संस्थासभकेँ ४० एम्बुलेन्स प्रदान

काठमाण्डू, ३१ जेठः भारत सरकार नेपालक विभिन्न जिलामे स्वास्थ्य संस्थासभकेँ ४० टा एम्बुलेन्स उपहारस्वरूप प्रदान कएलक अइछ। भारतीय दूतावासद्वारा आइ काठमाण्डू, वीरगञ्ज, पोखरा आ धरानमे विशेष कार्यक्रमक आयोजना क एम्बुलेन्स हस्तान्तरण कएल गेल। दूतावासक विज्ञप्ति अनुसार सातुटा प्रदेशक ३३ जिलामे विभिन्न स्वास्थ्य संस्थासभकेँ ई एम्बुलेन्स उपहार स्वरूप प्रदान कएल गेल अइछ। काठमाण्डूमे आयोजित कार्यक्रममे भारतीय दूतावासक नियोग उपप्रमुख प्रसन्न श्रीवास्तव बागमती, कर्णाली, लुम्बिनी आ सुदूरपश्चिम प्रदेशक विभिन्न नगरपालिका आ गाउँपालिकाक प्रमुखसभकेँ २२ टा एम्बुलेन्सक चाबी हस्तान्तरण कएलैन। वीरगञ्ज आ पोखरामे सात–सातटा तथा धरानमे चारटा एम्बुलेन्स प्रदान कएल गेल अइछ। उपप्रमुख श्रीवास्तव कहलैन, “भारत–नेपाल विकास साझेदारीअन्तर्गत नेपालक स्वास्थ्य पूर्वाधार मजबूत बनेबाक दिशामे ई सहयोग महत्वपूर्ण अइछ। ई उपहार भारत सरकारक दीर्घकालीन पहलके हिस्सा छी, जे भारत–नेपालबीच सात दशकसँ चइल आइब रहल गहिर सम्बन्ध आ सहयोगक निरन्तरता अइछ।” एम्बुलेन्स प्राप्त करैबला संस्थासभक प्रतिनिधिसभ भारत सरकारक निरन्तर सहयोग प्रति आभार प्रकट करैत कहलैन जे ई एम्बुलेन्ससभ ग्रामीण आ दुर्गम क्षेत्रधैर स्वास्थ्य सेवा पहुँचेबामे सहयोगी होएत। भारत सरकार सन् १९९४ बाद नेपालभैर स्वास्थ्य संस्थासभकेँ एक हजार ४९ टा एम्बुलेन्स उपहार स्वरूप प्रदान क चुकल अइछ। एकर अतिरिक्त शिक्षा, निर्वाचन आ सार्वजनिक सेवा क्षेत्रमे तीन दशकसँ स्कूल बससँ ल क विद्युतीय सवारीसाधनधैर विभिन्न सहयोग दैत आइब रहल अइछ। विज्ञप्तिमे जनाएल गेल अइछ जे नेपालक विभिन्न शैक्षिक संस्थासभकेँ ३०० टा स्कूल बस, सन् २०२२मे निर्वाचन संचालन लेल कानुन कार्यान्वयन निकाय आ निर्वाचन आयोगकेँ २०० टा सवारीसाधन आ हाल सम्पन्न ‘सगरमाथा संवाद’क आयोजनमे परराष्ट्र मन्त्रालयकेँ १५ टा विद्युतीय सवारी प्रदान कएल गेल छल। दूतावासक अनुसार, ई सहयोग भारत–नेपालबीच बहुआयामिक विकास साझेदारीकेँ आओर मजबूती देबाक उद्देश्यसँ कएल गेल अइछ, जाहिसँ दुइ देशक सम्बन्ध आओर सुदृढ होएत।